Bettag 2014

 

Am Bettag e Fahrt uff Bad Ragaz –

Im Auto bsetzt isch jede Platz –

A dr Seestraass 40 im Gaarte –

Tönd bereits zwei uff üüs waarte –

Ds Wetter schüü und alls parad –

Dr Grill schu startbereit daastaht –

Täller – Gleser – Bschtegg – Serviete –

S hett alls im Huus – mä mos nüüt miete –

Alls staht i Reih und Gliid parad –

Wänns etz dä a ds Schnabuliere gaht.

Dr Zapfe knallt – das mos so sii –

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Sooviil Fraue – aber nei –

Eb echt alli d’Schue abputzt hei –

Der glänzig Bode – s isch z beduure –

Isch etz volle Gaartespuure –

Aber d’Gaschtgeberi laht das chalt:

Das macht doch nüüt – dä putzt me halt.

Chänd nu ine – s söll gmüetli sii –

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Woo isch ds Fleisch – s mos uffe Grill –

Wäme dr Hunger stille will –

Es rüeft dr Grillmeischter Franz:

D’Würscht sind dure – und zwar ganz!

Daas Salatbüffe – s isch e Pracht –

Jedi Frau hett ettis gmacht –

Salat i grüe – gelb – rot und wiiss –

Salat us Herdöpfel oder Riis –

Und dä nuch e feins Söseli drzue –

Mä chännt liecht ettis Tümmers tue –

Ds Brot chnusperig und gsund –

Ds Muul wird wässerig – nüd uuni Grund!

Es chännt bimeid nüd schüüner sii -

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Es gitt zwii Rundene oder drii –

S mos schliessli alles ggesse sii –

Es mundet alls so wunderbar –

Dr Platz im Buuch wird langsam rar –

Deer Salat mosi nuch probiere – und deer au –

Hesch echt kä Gnad – gueti Frau –

Ich mos dä ä nuch möge vum Süesse –

Sust mosis garämänt nuch büesse –

Nu nüd draa tängge – locker sii –

Nimm ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Etz mosi aber anderscht tängge –

Ich mos doch nuch mis Auto längge –

Sofort uffe Wii verzichte –

Sust chännti nuch Tumms aarichte –

Schliessli hani e choschtbari Fracht –

Die hätti geere heil heipracht –

Nach dem Salat und dener Wurscht –

Passt au Wasser füre Turscht –

Mit demm chume topfnüechter sii.

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Gspüreders – es Regätröpfli –

Und nuch mii falled uff üseri Chöpfli –

Nu kä Panik – gueti Frau –

Dr Himel wird schu wider blau –

Mir pliibed nuch es Wiili da –

Häd ja nuch kä Desseer ghaa.

Aber lueg ämal der Tisch –

Was daa nu alls uusbreitet isch:

S wird jede süesse Gluscht abdegge –

Für jedes Muul hetts ettis z schlegge –

Chueche – Tuurte – Fruchtsalat –

Au e Himbeertiramisu staht parad –

Im Hotel chännts nüd besser sii.

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

  

Was chunnd da fürne feine Duft –

Kaffiduft liit i dr Luft –

Dr Automaat mags chuum verdaue –

Kaffi süüde für sövel Fraue –

Mä mos ä sone Automaat echlei vergwänne –

Und em halt es Phäuseli gönne –

Dä funkzioniert de Technik iiwandfrii.

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Langsam mome a ds Heiguu tängge –

Und d’Gedangge i Zigerschlitz längge.

Aber halt – ihr Riiffe und ihr Junge –

Mir häd ja nuch käs Liedli gsunge –

Wämer schu törfed bi dr Verena sii –

Moses doch nuch Musikalisches gii.

Also – ds Muul wiit uuf – dr Mundring gspannt –

Etz tömer nuch singe alli mitänand –

Es gitt diversi Liederwüntsch z verbueche –

D’Verena mos gu d’Noote sueche –

Mir bringed de Frau nuch mii i Schwung –

Aber gell Verena – dä pliibtme jung.

Es isch e gfreute Bettag gsii.

Nänd ds Glas i d’Hand – dr Franz schängt ii –

Und d’Verena – gschäftig we dr Wind –

Lueget as alli zfride sind!

 

Aber nei – etz hämer fertig trungge –

Etz wird nu nuch zum Abschiid gwungge –

Zämeruume – ds Gschiir abwäsche –

Alls versoorge i dä Täsche –

Adie säge – sich bedangge –

Und dä Richtig Parkplatz wangge –

Mir säged tschau a Bad Ragaz –

Und nänd i üserne Auto Platz –

Ussem sunnige Ragaz – s isch allerhand –

Faremer direggt ine Regäwand.

Wohlbehalte simmer wider da –

Mir häd e tolle/feine Sunntig gha.

Nuchämal a Dir – Verena – und Dim Franz –

Sägemer tangge – und zwar ganz –

Und wämer dr Bode halt verdregget heid –

Und Du hesch möse butze – tots üüs leid…       

 

kr.